Түптө токой аймактары калыбына келтирилет
Түп токой чарбасында жаратылышты коргоо жана токой экосистемаларын жандандырууга багытталган гранттык долбоор ишке ашырылат. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Маалыматка ылайык, Түп токой чарбасынын директору Рахат Эсенгул уулу 100 гектар аянттагы токойлорду калыбына келтирүүгө багытталган долбоорду бекитти.
Демилге токой аймактарын калыбына келтирүүгө жана аймактын экологиялык абалын жакшыртууга багытталган.
Долбоор Эл аралык айыл чарбасын өнүктүрүү фондунун (IFAD) колдоосу менен “Регионалдык жайыт жамааттарынын туруктуулугу – АДАПТ” долбоорунун алкагында ишке ашырылат.
Ошондой эле эл аралык миссиянын өкүлдөрү Түп районунун Сары-Булуң айылында жайгашкан “Нур” жана “Ийгилик” кооперативдеринин мүчөлөрү менен жолугушуп, жергиликтүү жамааттарды колдоо, жаратылыш ресурстарын сарамжал пайдалануу жана айыл аймактарын өнүктүрүү маселелерин талкуулашты.
