Ысык-Көлдө эл аралык бажы IT-конференциясы башталды

1-июнда Ысык-Көл облусунда “Бажы экосистемасы боюнча диалог” аттуу III эл аралык IT-конференция өз ишин баштады. Бул тууралуу Мамлекеттик бажы кызматынан билдиришти.

Маалыматка ылайык, иш-чарага бир катар өлкөлөрдүн бажы кызматтарынын жетекчилери, эл аралык уюмдардын өкүлдөрү жана IT-адистер катышууда.

Конференциянын ачылышында Мамлекеттик бажы кызматынын төрагасы Алмаз Салиев азыркы бажы органдары текшерүүчү түзүм гана болбостон, эл аралык сооданы, логистиканы жана санариптик кызматтарды байланыштырган экосистемага айланганын белгиледи.

Иш-чаранын жүрүшүндө катышуучулар бажы тармагына жасалма интеллектти киргизүү, санариптик транзиттик чечимдерди өнүктүрүү жана товарларды чек арадан өткөрүү жол-жоболорун ылдамдатуу маселелерин талкуулашууда.

Ошондой эле Азербайжан, Казакстан, Сингапур, Тажикстан, Түркия, Түркмөнстан жана Өзбекстандын өкүлдөрү өз өлкөлөрүндөгү тажрыйбалар менен бөлүшүүдө. Бул тажрыйбаларды Кыргызстандын бажы системасын санариптештирүүдө колдонуу пландалууда.

Конференция Мамлекеттик бажы кызматы тарабынан Бишкектеги ЕККУнун Программалык кеңсеси, Германиянын эл аралык кызматташтык коому (GIZ) жана Европа биримдигинин колдоосу менен уюштурулган.