Алдамчылык жолу менен 7,8 млн сомго ээлик кылган жаран кармалды
Алдамчылык жолу менен 7,8 миллион сомго ээ болуп, SIM-карталарды активдештирүүчү жана дропперликке шектүү жаран кармалды. Бул тууралуу ИИМдин юасма сөз кызматы билдирди.
Маалыматка ылайык, ички иштер органдарына Д.Н. аттуу жаран арыз менен кайрылып, белгисиз адамдарга карата чара көрүүнү суранган. Анын айтымында, белгисиз адамдар WhatsApp мессенжери аркылуу байланышып, аны тыюу салынган уюмдарды каржылоого тиешеси бар деген жалган маалыматтарды айтып, психологиялык басым көрсөтүү жолу менен 7 миллион 800 миң сом акча каражатын ээлеп алышкан.
Аталган факт боюнча Кылмыш-жаза кодексинин 209-беренеси (Алдамчылык) менен кылмыш иши козголгон.
Жүргүзүлгөн ыкчам-тергөө иш-чараларынын натыйжасында, ИИМдин кылмыш иликтөө башкы башкармалыгынын кызматкерлери тарабынан абоненттик номурларды активдештирүү жана аккаунттарды сатуу менен алектенген 27 жаштагы Ф.В. аттуу жаран аныкталып, кармалды. Тергөөнүн маалыматына ылайык, ал активдештирген номурлар жабырлануучуга карата алдамчылык аракеттерди жасоодо колдонулган.
Мындан тышкары, жабырлануучунун акча каражаттары которулган банктык эсептин ээси болгон 19 жаштагы А.Д. аттуу жаран дагы аныкталып, кармалган. Тергөөдө анын банктык картасын үчүнчү жактарга кылмыштуу схемага пайдаланууга берип койгону белгилүү болгон.
Соттун чечими менен эки шектүүгө тең Бишкек шаарындагы №1 тергөө абагында кармоо менен эки ай мөөнөткө камакка алуу түрүндөгү бөгөт коюу чарасы тандалды.
Ыкчам жүргүзүлгөн тинтүү учурунда ар түрдүү байланыш операторлоруна тиешелүү 155 SIM-карта, 7 уюлдук телефон, 2 ноутбук, ошондой эле экспертизага жөнөтүлгөн алтын түстөгү буюмдар салынган 8 зип-пакет табылып, алынган.
Ички иштер министрлиги жарандарды банктык карталарын, эсептерин, SIM-карталарын жана жеке маалыматтарын үчүнчү жактарга бербөөгө чакырат. Ошондой эле белгисиз адамдардан келген чалууларга жана билдирүүлөргө этият мамиле кылуу зарыл. Алдамчылар көп учурда жарандардын акча каражаттарын ээлеп алуу үчүн психологиялык басым көрсөтүү жана алдоо ыкмаларын колдонушат.
