Бишкекте көп функционалдуу аянтча пайдаланууга берилди
Бишкек шаарынын мэри Айбек Жунушалиев Абдрахманов жана Самойленко көчөлөрүнүн кесилишинде Капиталдык курулуш башкармалыгы тарабынан курулуп бүткөрүлгөн көп функционалдуу аянтчанын салтанаттуу ачылыш аземине катышты.
Бишкек шаардык мэриясынын басма сөз кызматынын маалыматына караганда, шаар башчысы Айбек Жунушалиев мындай объектилерди куруу өсүп келе жаткан муун үчүн заманбап спорт менен машыгууга жана активдүү эс алууга шарт түзүүгө, ошондой эле жашоочулар үчүн ыңгайлуу эс алуу жайларын уюштурууга багытталганын белгиледи.
“Биз бул багыттагы иштерди мындан ары да улантабыз. Алдыбызда чоң милдеттер турат. Быйыл республикалык бюджеттин колдоосу, ошондой эле инвестициялар жана мэриянын каражаттарынын эсебинен борбор калаада 36 мектептин курулушу пландалууда. Бишкекте шаар тургундарына зарыл болгон социалдык объектилердин саны дагы көбөйүшү үчүн бардык аракетибизди жумшайбыз»”, – деди мэр.
Долбоордун алкагында аймакта кичи футбол жана баскетбол аянтчалары, воркаут зонасы жана балдар оюн аянтчалары курулду. Аймактын жалпы аянты 0,6 гектарды түзөт. Ошондой эле тышкы жарыктандыруу системалары орнотулуп, чуркоо жолдору салынып, резина жабуу төшөлдү.
Мындан тышкары гранит менен капталган сырткы тепкичтер жана пандустар орнотулду. Аймакты көрктөндүрүү жана жашоочулар үчүн ыңгайлуу шарттарды түзүү боюнча кошумча иштер да аткарылды. Долбоор жергиликтүү бюджеттин каражаттарынын эсебинен каржыланды.
