Документтери жок ишмердүүлүк жүргүзгөн май куюучу жайдын иши токтотулду
Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаментинин Ош региондук башкармалыгы тарабынан курулуш объектилери туруктуу негизде көзөмөлдөнүп келет.
Курулуш, архитектура жана турак жай-коммуналдык чарба министрлигинин маалыматына караганда, Ноокат районунун Куу-Майдан айылында жайгашкан “Партнер Нефть” май куюучу станциясынын №1 тилкеси тиешелүү архитектуралык-долбоорлоо жана уруксат берүүчү документтерсиз пайдаланылып жаткандыгы аныкталды.
Тактап айтканда, объект мыйзамда белгиленген тартипте уруксат берүүчү документтерди албай туруп ишмердүүлүгүн жүргүзгөн. Бул Кыргыз Республикасынын “Шаар куруу жана архитектура жөнүндө” Мыйзамынын талаптарын бузуу болуп эсептелет.
Аныкталган мыйзам бузуулар боюнча “Партнер Нефть” май куюучу станциясына карата административдик чара көрүлүп, мыйзам бузуулар толук жоюлганга чейин анын ишмердүүлүгү токтотулду.
Департамент бардык компанияларды курулуш талап жана ченемдерин так сактоого чакырат.
