Кара-Балта дарыясынын жээги көрктөндүрүлөт
Курулуш, архитектура жана турак жай-коммуналдык чарба министрлигине караштуу Шаар куруу жана архитектура департаментинин Чүй облусу боюнча Жайыл райондук башкармалыгынын архитекторлору тарабынан Кара-Балта дарыясынын жээгин көрктөндүрүү үчүн эскиздик долбоор иштелип чыкты.
Курулуш, архитектура жана турак жай-коммуналдык чарба министрлигинин маалыматына ылайык, бул ирет Кара-Балта шаарындагы Кара-Балта дарыясынын жээгин, Жайыл Баатыр көчөсү менен кесилишкен аймакты көрктөндүрүү боюнча эскиздик долбоор даярдалды.
Долбоордо көчөлөрдү жарыктандыруу, отургучтарды жана таштанды урналарын орнотуу, жашыл аймактарды түзүү, жөө жүргүнчүлөр жана майыптыгы бар жарандар үчүн ыңгайлуу жөө жүрүү жолдорун салуу, ошондой эле параллелдүү унаа токтотуучу жайларды уюштуруу каралган. Мындан тышкары, аймактын транспорттук жеткиликтүүлүгү да эске алынган.
Бул долбоор ушул убакка чейин пайдаланылбай келген дарыя жээгиндеги аймакты заманбап, коопсуз жана көп функционалдуу коомдук мейкиндикке айландырууга багытталган. Аны ишке ашыруу шаар тургундарынын жашоо сапатын жакшыртып, аймактын көркүн арттырууга өбөлгө түзөт.
