Кыргызстан менен Дүйнөлүк банк экологиялык демилгелерди талкуулашты
Бишкекте Жаратылыш ресурстары, экология жана техникалык көзөмөл министри Акыл Токтобаев Дүйнөлүк банктын "Планета" багыты боюнча вице-президенти Гуанчжэ Чэнь менен жолугушту. Бул тууралуу министрликтин басма сөз кызматы билирди.
Жолугушууда тараптар Дүйнөлүк банк менен айлана-чөйрөнү коргоо, климаттык саясат жана тоолуу аймактарды өнүктүрүү жаатындагы кызматташтыгынын учурдагы абалын жана келечектеги иштерди талкуулашты.
Министр Акыл Токтобаев өлкөдө ишке ашырылып жаткан «Абанын сапатын жакшыртуу» (AQIP) долбооруна көрсөткөн колдоосу үчүн Дүйнөлүк банкка ыраазычылык билдирди. Анын айтымында, долбоордун алкагында абанын сапатын көзөмөлдөөнүн улуттук системасы жаңыланып, экологиялык мониторинг күчөтүлүүдө.
Жолугушууда эл аралык тоо күн тартиби да өзгөчө көңүл борборунда болду. Кыргыз тарап 2027-жылы өткөрүлүшү пландалып жаткан Бишкек+25 Экинчи Глобалдык тоо саммити боюнча даярдык иштери тууралуу маалымат берип, тоолуу мамлекеттердин туруктуу өнүгүүсүн колдоого багытталган эл аралык механизмдерди түзүү демилгесин тааныштырды.
Мындан тышкары, кызматташуунун жаңы багыттары катары геопарктарды өнүктүрүү жана туруктуу экотуризм маселелери каралды. Министр геопарктар жаратылыш жана геологиялык мурастарды сактоого, инвестиция тартууга, жаңы жумуш орундарын түзүүгө жана аймактарды туруктуу өнүктүрүүгө өбөлгө түзөрүн белгиледи.
Жолугушуунун соңунда тараптар стратегиялык өнөктөштүктү мындан ары чыңдоого, ошондой эле климаттык туруктуулук, айлана-чөйрөнү коргоо, тоолуу аймактарды өнүктүрүү жана жашыл экономиканы илгерилетүү багыттарындагы кызматташууну кеңейтүүгө даяр экендиктерин ырасташты.
