Анкарада Кыргызстандын курулуш долбоорлору тааныштырылды
Анкарада өтүп жаткан “Түркиянын курулуш саммити – 2026” эл аралык форумунда Кыргызстандын курулуш тармагын өнүктүрүү жана инвестиция тартуу мүмкүнчүлүктөрү тааныштырылды. Иш-чарага Курулуш, архитектура жана турак жай-коммуналдык чарба министри Нурдан Орунтаев баштаган делегация катышууда.
Министрликтин маалыматына ылайык, саммит курулуш тармагын өнүктүрүү, инновациялык технологияларды жайылтуу жана эл аралык кызматташтыкты кеңейтүүгө багытталган ири аянтча болуп саналат.
Иш-чаранын жүрүшүндө министр кыргыз-түрк кызматташтыгын кеңейтүүнүн маанилүүлүгүн белгилеп, эки өлкөнүн курулуш компанияларынын ортосундагы өнөктөштүктү чыңдоо үчүн кеңири мүмкүнчүлүктөр бар экенин айтты.
Мындан тышкары, Нурдан Орунтаев Түркиянын Куруучулар союзунун президенти Эрдал Эрен менен жолугушуп, курулуш тармагындагы кызматташтыкты мындан ары өнүктүрүү маселелерин талкуулады.
Министрлик белгилегендей, иш-чара Кыргызстандын инвестициялык мүмкүнчүлүктөрүн таанытууга, эл аралык өнөктөштүктү кеңейтүүгө жана курулуш тармагына алдыңкы технологияларды тартууга шарт түзөт.
