Ысык-Көлдүн жээгине курулуп жаткан мейманкананын абалы текшерилди
Президентке караштуу Инвестициялар боюнча улуттук агенттик Ысык-Көл облусунун Кара-Ой айылында көлдүн жээгинде курулуп жаткан беш жылдыздуу мейманкана комплексинин курулуш иштерин текшерди. Бул тууралуу аталган агенттиктен билдиришти.
Маалыматка караганда, мейманкана комплекси Азербайжандын президентинин иш башкармалыгы менен Кыргызстандын Министрлер Кабинетинин ортосундагы кызматташтыктын алкагында курулууда. Долбоор аймактагы туристтик инфраструктураны өнүктүрүүгө багытталган.
Комплекстин курамына ар кандай категориядагы мейманкана бөлмөлөрү, конференц-залдар, коомдук тамактануу жайлары, эс алуу жана ден соолукту чыңдоо зоналары кирет.
Объект туристтерди, расмий делегацияларды, бизнес өкүлдөрүн жана эл аралык иш-чаралардын катышуучуларын жайгаштырууга багытталат.
Учурда объектте монтаждоо жана жасалгалоо иштери улантылууда. Имараттын негизги курулуш конструкцияларын тургузуу аяктап, ички жана тышкы жасалгалоо иштери, ошондой эле инженердик коммуникацияларды жана технологиялык жабдууларды орнотуу жүргүзүлүүдө.
Мейманкана комплексинин курулушу Ысык-Көл аймагындагы туристтик инфраструктураны өнүктүрүүгө, жаңы жумуш орундарын түзүүгө жана туризм тармагына инвестицияларды тартуу мүмкүнчүлүктөрүн кеңейтүүгө өбөлгө түзөт.
