Ат-Башыда каналдар тазаланып, жол оңдолууда
Ат-Башы районундагы Баш-Кайыңды айыл аймагында муниципалитеттер аралык кызматташуунун жана ашар ыкмасынын негизинде айыл чарбасын өнүктүрүүгө багытталган маанилүү иштер кызуу жүрүп жатат. Бул тууралуу Ат-Башы райондук админстрациясынан билдирди.
Маалыматка ылайык, учурда жалпы узундугу 9 чакырым болгон Сары-Тал каналы тазаланып, оңдолууда. Бул каналды оңдоп, тазалоосу бүтсө 1000 гектардан ашык айдоо аянты сугат суу менен туруктуу камсыз болот. Ошондой эле Өзгөрүш айылынын капталындагы 3 км болгон Көк-Каптал каналы да тазаланып, 300 гектар жер суу менен камсыз болуп, дыйкандардын эмгегинин үзүрүн арттырууга жана айыл чарба өндүрүшүнүн көлөмүн көбөйтүүгө шарт түзүлдү.
Канал тазалоо иштеринен тышкары, Чар – Ак-Муз унаа жолунун 3,9 – 11,7-чакырым аралыгындагы жалпы 7,8 чакырым бөлүгүнө асфальт төшөө жумуштары аткарылууда. Бүгүнкү күндө жолдун 3 чакырымына асфальт төшөлүп бүтүп, курулуш иштери белгиленген графикке ылайык уланууда.
Аталган долбоорлордун ишке ашырылышы, райондун социалдык-экономикалык өнүгүүсүнө олуттуу салым кошуп, сугат суу менен камсыздоону жакшыртат жана жол коопсуздугун жогорулатып калктын жашоо шартын дагы да жакшыртууга өбөлгө түзөт.
