“Келечек” эл аралык стипендиясын түзүү демилгеленди
Кыргызстанда маданият, искусство жана көркөм билим берүү тармагындагы адистерди даярдоо үчүн “Келечек” эл аралык мамлекеттик стипендиясын түзүү демилгеленүүдө. Бул тууралуу Маданият министрлигинен билдиришти.
Маданият, маалымат жана жаштар саясаты министрлиги иштеп чыккан токтом долбоору коомдук талкууга коюлду. Жобого ылайык, стипендия музыкалык, театралдык, хореографиялык, көркөм сүрөт, кино өнөрү, музей иши, реставрация, маданият мекемелерин башкаруу жана башка чыгармачыл багыттар боюнча билим алуу, стажировка өтүү же квалификациясын жогорулатуу үчүн берилет.
Талапкерлер чет өлкөдөгү окуу жайдан кабыл алынганын же расмий чакыруу алганын тастыкташы керек. Бирок мындай документтин болушу стипендия автоматтык түрдө берилет дегенди билдирбейт. Программа бюджеттен каржыланып, стипендия конкурстук негизде ыйгарылат.
Ошол эле учурда чет өлкөгө тапшыруу, виза алуу, жашоо жана башка кошумча чыгымдар талапкерлердин мойнунда болот.
Стипендия алгандар окуусун аяктагандан кийин өлкөгө кайтып келип, алган адистиги боюнча 1-5 жыл иштөөгө милдеттендирилет.
