Манас шаарында 500 орундуу мектеп курулууда
Президент Садыр Жапаровдун тапшырмасына ылайык Курулуш министрлиги тарабынан Манас шаарында алты жаңы мектеп курулууда. Алардын бири – Манас муниципалдык аймагында жайгашкан 500 орундуу №13 мектеп.
Курулуш министрлигинин маалыматына таянсак, долбоорго ылайык, билим уясы беш блоктон турган үч кабаттуу имарат болуп курулууда. Жалпы аянты 4215 чарчы метрди түзөт.
Анда заманбап окуу класстары, китепкана, эки кабаттуу 322 орундуу жыйындар залы, азык-түлүк сактоочу кампасы менен ашкана жана бардык шарттары каралган спорт зал жайгашат.
Учурда курулуш аянтчасында 60 жумушчу эмгектенип жатат. Имараттын биринчи кабатынын дубалдары тургузулуп, үчүнчү кабаттын монолиттик иштери аяктап калды.
Курулуш-монтаждоо иштеринин сапаты тиешелүү департаменттер тарабынан туруктуу көзөмөлгө алынып, аткарылган иштердин ар бир этабы белгиленген талаптарга ылайык текшерүүдөн өткөрүлүүдө.
