Мыйзамсыз шагыл казгандарга айып пул салынды
Жаратылыш ресурстары, экология жана техникалык көзөмөл министрлигине караштуу Экологиялык жана техникалык көзөмөл кызматынын тескөөчүлөрү жана ыйгарым укуктуу өкүлчүлүктүн укук тартиби, коомдук коопсуздук жана өзгөчө кырдаалдар бөлүмүнүн кызматкерлери тарабынан Манас шаарына караштуу Кыргызстан айылынын аймагындагы Көк-Арт дарыясында биргелешкен ыкчам рейддик иш-чара өткөрүлдү.
Экологиялык жана техникалык көзөмөл кызматынын маалыматына ылайык, рейддин жүрүшүндө “Барсбек Коган Ко” ишканасы тарабынан дарыянын нугунан мыйзамсыз түрдө шагыл-кум аралашмасын казып алуу фактысы аныкталды.
Аталган мыйзам бузуу боюнча юридикалык жакка 35 000 сом өлчөмүндө административдик айып пул салынды. Ошондой эле ушул эле берененин 4-бөлүгүнүн негизинде мыйзам бузууга катышкан жеке жаранга 13 000 сом өлчөмүндө административдик айып пул чегерилди.
Экологиялык жана техникалык көзөмөл кызматы жаратылыш ресурстарын мыйзамсыз пайдаланууга каршы көзөмөл иш-чараларын мындан ары да күчөтүп, экологиялык мыйзамдардын талаптарын бузган бардык учурларга мыйзам чегинде чара көрүлөрүн эскертет.
