Саркынды сууларды төккөн ишканага айып пул салынды
Чүй облусунун Ысык-Ата районунда айлана-чөйрөгө саркынды сууларды төккөн мыйзам бузуу фактысы аныкталды. Бул тууралуу Жаратылыш ресурстары министрлигинен билдиришти.
Маалыматка таянсак, Жаратылыш ресурстары министрлигине аталган райондогу Ысык-Ата айыл өкмөтүнүн аймагында жайгашкан “Дачи в Норусе” коомдук бирикмесинин жана “Надежда” айыл чарба өндүрүштүк кооперативинин жамааттык кайрылуусунун негизинде Экологиялык жана техникалык көзөмөл кызматынын Чүй аймактык башкармалыгынын тескөөчүлөрү тарабынан “Грин Гоу” ишканасына карата чаралар көрүлгөн.
Ишканага айлана-чөйрөнү коргоо жана экологиялык коопсуздук жаатындагы мыйзам талаптарын бузгандыгы үчүн бир нече протоколдор түзүлүп, жалпы суммасы 111 000 сом өлчөмүндө айып пул салынды.
Мындан тышкары, аныкталган мыйзам бузуу фактыларын жоюу боюнча эскертүү берилди.
