Улуттук коопсуздукка коркунуч жараткандар жарандыктан ажыратылат
Президент Садыр Жапаров Кыргызстандын жарандыгы маселелерин кароо тартибине өзгөртүүлөрдү киргизген Жарлыкка кол койду. Бул тууралуу президенттик админстрациянын маалыматтык саясат бөлүмүнөн билдиришти.
Жаңы тартипке ылайык, жарандык алуу жана андан чыгуу боюнча бардык документтер автоматташтырылган маалыматтык система аркылуу электрондук жана кагаз түрүндө таризделет. Мындан ары арыздар электрондук кол тамга менен да ырасталат.
Ошондой эле жарандык алуу үчүн чет өлкөлүк жарандар жана жарандыгы жок адамдар Кыргызстанда каттоодо болуп, жашоого уруксат берүүчү документтердин бирине ээ болушу керек. Бирок бул талаптар этникалык кыргыздарга жана өлкөдө жашаган айрым жарандыгы жок адамдарга тиешелүү болбойт.
Мындан тышкары, Кыргызстанда төрөлгөн этникалык кыргыздардын балдары ата-энесинин жарандыгына карабастан Кыргызстандын жараны деп таанылат.
Жарлыкта улуттук коопсуздукка коркунуч жараткан учурларда жарандык берүүдөн баш тартуу же айрым жарандарды жарандыктан ажыратуу негиздери да каралган.
Жаңы өзгөртүүлөр расмий жарыяланган күндөн тартып 10 күндөн кийин күчүнө кирет.
