Жолду оңдоо иштеринде курулуш нормаларын бузган ишканага айып пул салынды
Жалал-Абад облусундагы Үч-Терек – Жетиген жолунун оңдоо иштеринде курулуш нормаларынын бузулушу аныкталды. Бул тууралуу Курулуш министрлигинин маалымат кызматы билдирди.
Маалыматка ылайык, Мамлекеттик архитектуралык-курулуш көзөмөл департаменти жолдун оңдоо иштерин текшерип, лабораториялык анализ үчүн үлгүлөрдү алган. Изилдөөнүн жыйынтыгында бир катар мыйзам бузуулар аныкталган.
Тактап айтканда, айрым жерлерде асфальт бетон негизсиз түз эле топурактын үстүнө төшөлгөнү белгилүү болгон. Мунун кесепетинен жолдун айрым бөлүктөрүндө жабуунун деформациясы жана жылышы катталган.
Долбоор боюнча асфальттын калыңдыгы 7 сантиметр болушу керек болсо, текшерүүдө анын айрым жерлерде болгону 3 - 5 сантиметр экени аныкталган.
Текшерүүнүн жыйынтыгында лицензияланган карьерден алынган материалдарды колдонуу, талаптарга жооп бербеген тилкелерди кайра оңдоо жана бардык кемчиликтерди толук жоюу боюнча милдеттүү көрсөтмөлөр берилди.
Ошондой эле оңдоо иштерин жүргүзгөн мамлекеттик жол ишканасы “ДЭП-30га”курулуш нормаларын так сактоо тапшырылып, аныкталган мыйзам бузуулар үчүн 200 миң сом өлчөмүндө айып пул салынды.
