Ошто коомдук транспоттун каттамдык багыты өзгөртүлөт
Ош шаарында коомдук транспорттун каттамдык багыттарын кайра кароо боюнча комиссиянын биринчи жыйыны өттү. Жыйынга Ош шаарынын мэринин орун басары Эрнис Толтоев төрагалык кылды. Бул тууралуу Ош шаардык мэриясынан маалымдашты.
Маалыматка ылайык, жыйында шаар чоңоюп, калктын саны көбөйүп жатканы айтылды. Жаңы конуштар, жаңы көчөлөр пайда болду, жолдор өзгөрдү. Борбордук базар жаңы жерге көчкөндөн кийин адамдардын жүргөн багыты да өзгөрдү. Ошондуктан азыркы автобус каттамдарынын көбү элдин муктаждыгына жооп бербей калгандыгы белгиленди.
Ушу тапта, Ош шаарында 38 маршруттук кичи автобус каттамы иштейт. Күнүнө 470– 500гө жакын кичи автобус чыгат. Мындан сырткары 11 муниципалдык автобустук каттамда 105 – 110 автобус, №1 жана №2 троллейбус каттамдарында 24 – 26 троллейбус жүрөт. Шаарда жүргүнчүлөрдүн көбүн жеке кичи автобустар ташыйт. Ошон үчүн бардык каттамдарды толук талдап чыгып, кайра караш керектиги айтылды.
Комиссиянын курамына шаардык кеңештин депутаттары, мамлекеттик органдардын өкүлдөрү, шаардык кызматтардын жетекчилери жана транспорт боюнча адистер кирди.
