1-сентябрдан тарта чет өлкөлүк номурлуу унааларды каттоо токтотулат
Президенти тарабынан 2026-жылдын 3-июнундагы “Чет өлкөлүк мамлекеттик каттоо белгилери бар транспорт каражаттарын легалдаштырууну аяктоо жана алардын жүгүртүлүшүн жөнгө салуу чаралары жөнүндө” Жарлыкка кол коюлган.
Экономика жана коммерция министрлигинин маалыматына ылайык, Жарлыкта 2026-жылдын 1-сентябрына чейин күчүндө боло турган транспорт каражаттарын легалдаштыруунун кошумча тартиби каралган.
Кыргызстандын аймагына 2024-жылдын 31-декабрына чейин киргизилген жана белгиленген тартипте мамлекеттик каттоодон өтпөгөн транспорт каражаттары гана легалдаштырылат.
2025-2026-жылдары Кыргызстандын аймагына киргизилген автотранспорт каражаттары бул Жарлыктын колдонуу чөйрөсүнө кирбейт жана легалдаштырылбайт.
Кошумча легалдаштыруу тартиби бир жолку, өзгөчө жана акыркы мүнөзгө ээ болуп, узартылбайт. 2026-жылдын 1-сентябрынан кийин чет өлкөлүк мамлекеттик каттоо белгилери бар транспорт каражаттарын легалдаштырууга жол берилбейт.
Айрыкча көңүл буруучу жагдай – ушул Жарлыктын алкагында легалдаштыруу жол-жобосунан өткөн транспорт каражаттары үчүнчү жактардын пайдасына ажыратылууга жатпайт. Мындай транспорт каражаттарын сатууга, белекке берүүгө, ишеним кат боюнча өткөрүп берүүгө, ижарага берүүгө же башка жол менен башка адамдарга өткөрүп берүүгө тыюу салынат.
Легалдаштырылган транспорт каражатын башкарууга аны легалдаштыруу тартибине ылайык кимге катталган болсо, ошол адамга гана уруксат берилет.
Экономика жана коммерция министрлиги жарандарды легалдаштыруу жол-жобосунан өтпөгөн жана мурда катталган өлкөлөрдө каттоодон чыгарылбаган чет өлкөлүк мамлекеттик каттоо белгилери бар транспорт каражаттарын сатып албоого чакырат.
Мындай транспорт каражаттарын сатып алуу – аларды мыйзамдуу каттоонун жана Кыргызстандын аймагында андан ары пайдалануунун мүмкүн эместигин кошо алганда, олуттуу укуктук жана финансылык тобокелдиктерге алып келет.
