Бишкекте курулуп жаткан мектептер текшерилди
21-июнда Курулуш, архитектура жана турак жай-коммуналдык чарба министри Нурдан Орунтаев тиешелүү департаменттердин жетекчилери менен биргеликте Бишкек шаарында курулуп жаткан 12 мектептин курулуш иштеринин жүрүшү менен таанышты. Бул тууралуу аталган министрликтин басма сөз кызматы билдирди.
Маалыматка ылайык, текшерүү иштери курулушу ушул жылдын башында башталган Октябрь жана Ленин райондорундагы жаңы мектептерде жүргүзүлдү. Көчмө текшерүүдө курулуштун сапаты, жумушчулардын саны, иштин жүрүү темпи жана графиктин сакталышы каралды. Ошондой эле колдонулуп жаткан курулуш материалдарынын сапатына өзгөчө көңүл бурулду.
Текшерүүгө алынган мектептер:
Ленин району:
№42 мектепке 385 орундуу жаңы корпус
Кашка-Баш айылы 750 орундуу жаңы мектеп
Ак-Ордо конушу, 750 орундуу жаңы мектеп
№55 мектепке 1200 орундуу жаңы корпус
Жал кичи району, №72 мектепке 750 орундуу корпус
Арча-Бешик конушу, №79 мектепке 560 орундуу жаңы корпус
Октябрь району:
Көк-Жар конушу, №88 мектепке 500 орундуу жаңы корпус
Түштүк пландоо аймагы, 750 орундуу жаңы мектеп
№8 кичи район, №64 мектепке 800 орундуу жаңы корпус
Өскөн-Ордо конушу 750 орундуу жаңы мектеп
Кара-Жыгач конушу, №91 мектеп 750 орундуу жаңы корпус
Көк-Жар айылы 750 орундуу жаңы мектеп
Министр өз сөзүндө курулуш иштеринин сапаты жана белгиленген мөөнөттөрдүн так аткарылышы өзгөчө көзөмөлдө болорун белгиледи. Айрым объектилерде курулуш темпи жай жүрүп жатканы жана жумушчу күчүнүн жетишсиздиги белгиленип, тиешелүү подряддык уюмдарга эскертүүлөр берилди. Кээ бир курулуш иштеринде аныкталган кемчиликтерди жоюу боюнча мөөнөт коюлду.
Белгилей кетсек, бүгүнкү күндө президенттин тапшырмасына ылайык, Бишкек шаарында республикалык бюджеттин эсебинен жалпы 20 билим берүү объектисинин курулушу жүрүп жатат.
Алар: Октябрь району – 6 объект, Ленин району – 6 объект, Биринчи май району – 5 объект, Свердлов району – 3 объект.
Долбоорлор Курулуш министрлиги тарабынан ишке ашырылууда.
