Бишкекте велосипед үчүн атайын жолдор чийилүүдө
Шаардык велосипед инфраструктурасын өнүктүрүүнүн алкагында Токтогул көчөсүндө веложол үчүн жаңы бөлгүчтөр коюлууда. Бул тууралуу Бишкек шаардык мэриясынан билдиришти.
Маалыматка ылайык, биринчи сыноо тилкеси – Токтогул көчөсү Айтматов проспектисинен тартып Жаш Гвардия бульварына чейинки бөлүгү болот. Бул тилкеде бөлгүчтөрдү орнотуунун натыйжалуулугу алардын жол кыймылынын коопсуздугуна жана бардык жол катышуучуларына тийгизген таасири бааланат.
Сыноо мөөнөтү аяктагандан кийин жашоочулардын жана веложол колдонуучулардын пикирлерин эске алуу менен жыйынтыктар талданат. Алынган маалыматтардын негизинде долбоорду мындан ары кеңейтүү жана шаардын башка аймактарына бөлгүчтөрдү орнотуу боюнча чечим кабыл алынат.
Экинчи этапта Токтогул көчөсү Айтматов проспектисинен Абдрахманов көчөсүнө чейинки бөлүгүндө иш жүргүзүү пландалууда.
Сыноо учурунда эң ыңгайлуу жана коопсуз чечимди табуу үчүн бөлгүчтөрдүн формасын, өлчөмүн же конструкциясын өзгөртүү мүмкүнчүлүгү да каралат.
Долбоордун негизги максаты – велосипедчилердин коопсуздугун жогорулатуу жана шаар ичинде жүрүү үчүн ыңгайлуу шарттарды түзүү.
