Ошто ичүүчү суу убактылуу токтотулду
Папан суу сактагычынын ылайланышына байланыштуу Ош шаарынын айрым аймактарында ичүүчү суу убактылуу токтотулду.
Шаардык мэриянын маалыматына ылайык, Ош шаарына үзгүлтүксүз таза суу берүү максатында курулган резервуарлар иштеп жатат. Бирок андагы суунун запасы 2 күнгө гана жетет.
Суунун үзгүлтүккө учуроосуна Папан суу сактагычынынын булганышы себеп болууда. Анткени кампаларга ушул жактан гана суу келет.
Анын булгануусуна тынымсыз жааган жаандан улам кокту-колоттордон, шагыл-кум алынуучу карьерлерден аккан ылай суу себеп болуп жатат. Ошондой эле Ак-Буура дарыясы да булганууда.
Бардык тиешелүү кызматтар шаардыктарга суу берүү үчүн күчөтүлгөн тартипте иш алып барууда. Мэрия жарандарды абалды туура түшүнүүгө чакырат.
