Ишкерлерге агробизнести өнүктүрүүгө жеңилдетилген насыя берилет
"Айыл чарбасында климаттын өзгөрүшүнө туруктуу кошумча нарк чынжырчаларын өнүктүрүү" долбоорунун алкагында мөмө-жемиш жана жашылча өндүрүмдөрүн сактоо, кайра иштетүү жана логистика тармагында иш алып барган ишкерлер үчүн жеңилдетилген каржылоо сунушталууда.
Долбоордун алкагында ишкерлер сом эквивалентинде 5 млн АКШ долларына чейин насыя ала алышат. Каржылоонун мөөнөтү 10 жылга чейин белгиленип, жылдык үстөк пайызы 6%ды түзөт. Ошондой эле негизги карызды төлөө боюнча үч жылга чейинки жеңилдетилген мөөнөт каралган.
Насыя каражаттары мөмө-жемиш жана жашылча азыктарын кургатуу жана тоңдуруу шаймандарын сатып алууга, шире, пюре жана концентрат өндүрүүгө, соода-логистикалык борборлорду курууга, муздаткыч кампаларды түзүүгө жана жаңылоого жумшалышы мүмкүн.
Мындан тышкары, өндүрүмдү сорттоо, жуу жана таңгактоо үчүн жабдууларды сатып алууга, ошондой эле рефрижератордук транспортту жана тиешелүү инфраструктураны өнүктүрүүгө да каржылык колдоо көрсөтүлөт.
Жеңилдетилген насыялар мамлекеттик А Банк жана Элдик Банк аркылуу берилет.
