Лейлек районундагы мал союлуучу жайлар текшерилди
Ветеринария, мал чарбасын өнүктүрүү, жайыт жана тоют кызматынын жетекчиси Адилет Сотовалдиев Лейлек районуна болгон иш сапарынын алкагында район аймагындагы мал союлуучу жайлардын жана мал базарларынын учурдагы абалы менен таанышты. Бул тууралуу Айыл чарба министрлигинен билдиришти.
Маалыматка ылайык, иш сапардын жүрүшүндө мал союлуучу жайлардагы ветеринардык-санитардык талаптардын аткарылышы, малдарды ветеринардык кароодон өткөрүү тартиби, эт азыктарынын коопсуздугун камсыздоо боюнча жүргүзүлүп жаткан иштер жана базарлардагы ветеринардык көзөмөлдүн уюштурулушу каралды.
Текшерүүнүн жыйынтыгында ветеринардык-санитардык коопсуздукту камсыз кылуу максатында көзөмөлдү күчөтүү боюнча тиешелүү адистерге бир катар тапшырмалар берилди. Айрыкча мал союлуучу жайларда санитардык-гигиеналык нормаларды так сактоо, союлган малдын ветеринардык экспертизадан өз убагында өткөрүлүшү жана мал базарларында ветеринардык коштоочу документтердин болушун камсыздоо маселелерине өзгөчө көңүл бурулду.
Адилет Сотовалдиев ветеринардык-санитардык талаптарды сактоо калктын саламаттыгын коргоодо жана азык-түлүк коопсуздугун камсыздоодо маанилүү орунду ээлей турганын белгиледи.
Мындан тышкары, санитардык талаптардын аткарылышын камсыз кылуу, ветеринардык көзөмөлдүн натыйжалуулугун жогорулатуу жана мыйзам бузууларды алдын алуу боюнча кошумча иш-чараларды жүргүзүү тапшырмасы берилди.
Ветеринария, мал чарбасын өнүктүрүү, жайыт жана тоют кызматы тарабынан мал чарба продукцияларынын коопсуздугун камсыз кылуу, эпизоотиялык туруктуулукту сактоо жана ветеринардык-санитардык көзөмөлдү өркүндөтүү багытындагы иштер мындан ары да улантылат.
