Жалпы дарыгерлик практика борборунун жылуулук тутуму 14 млн сомго оңдолду
Куршаб Жалпы дарыгерлик практика борборунда 90 орундуу стационарда болгону 28 бейтап дарыланып жаткан. Мунун негизги себептеринин бири – адистердин тартыштыгы жана нормалдуу жылытуу тутумунун жоктугу болгон. Күн суук мезгилде жергиликтүү тургундардын көбү Ош жана Өзгөн шаарларынын ооруканаларына кайрылып келишкен. Бул тууралуу аталган медициналык борбордун жетекчиси Элмурат Эркулов билдирди.
Маалыматка ылайык, көйгөйдү чечүү үчүн Саламаттыкты сактоо министрлиги жана жергиликтүү бийлик органдары менен биргеликте жылытуу тутумун оңдоого каражат бөлүнгөн. Оңдоп-түзөө иштерине 14 миллион сомго жакын каражат кеткен. Бүгүнкү күндө борборлоштурулган жылытуу тутуму толугу менен иштеп жатат, ал эми бейтаптар үчүн шарттар кыйла жакшырды.
Муну менен катар медициналык кадрларды тартуу боюнча да иштер жүргүзүлдү. Бир жылдын ичинде ооруканага 22 адисти тартууга мүмкүн болгон.
