Медициналык-социалдык эксперттик комиссиянын кызматкерлери кармалды
Саламаттыкты сактоо тутумундагы коррупцияга каршы жүргүзүлгөн иш-чаралардын алкагында, УКМК тарабынан Бишкек шаарынын Свердлов районундагы №2 медикциналык-социалдык эксперттик комиссиясынын кызматкерлеринин мыйзамсыз иштери аныкталып, бөгөт коюлду. Бул тууралуу УКМКдан билдиришти.
Маалыматка ылайык, Кылмыш-жаза кодексинин 342-беренеси (Пара алуу) боюнча козголгон кылмыш ишинин алкагында комплекстүү тергөө-ыкчам иш-чаралары жүргүзүлдү. Анын жыйынтыгында жарандардан майыптуулукту белгилөө жана мөөнөтүн узартуу маселелерин чечүү үчүн системалуу түрдө пара алууга шектелип, аталган комиссиянын төрайымы Ч.Т. жана дарыгер-эксперти Т.Э. кармалды.
УКМК мамлекеттик жана муниципалдык кызматкерлерди мыйзам талаптарын так сактоого, ар кандай коррупциялык көрүнүштөрдөн алыс болууга жана коррупциялык кылмыштар үчүн жоопкерчиликтин кутула албастыгын эстен чыгарбоого чакырат.
