Салык төлөөнү жеңилдетүү жолдору иштелип чыгууда
Мамлекеттик салык кызматы салыктык жол-жоболорду жөнөкөйлөтүү жана салык төлөөчүлөр үчүн ыңгайлуу шарттарды түзүү боюнча иштерди улантууда.
Салык кызматынын маалыматына таянсак, салык төлөөчүлөрдү жоюу учурундагы иш регламентине салыктык эсептен чыгаруу жол-жобосун жөнөкөйлөтүүгө багытталган өзгөртүүлөр киргизилди.
Жаңы өзгөртүүлөр төмөнкүлөрдү камтыйт:
Жеке ишкерлер үчүн ишмердүүлүгүн токтотуу жөнүндө арыз берилген учурда, салык органы тапшырылган отчетторду өз алдынча текшерип, эсептердин жана транзакциялык активдүүлүктүн бар-жогу тууралуу маалымат алуу үчүн коммерциялык банктарга суроо-талап жөнөтөт. Эгер салыктар жана башка милдеттүү төлөмдөр боюнча карыздар жок болсо, жоюу жол-жобосу 15 жумуш күнүнүн ичинде аяктайт.
Юридикалык жактар үчүн Юстиция министрлигинен жоюу тууралуу билдирүү алынгандан кийин, салык органы отчетторду текшерип, банктардан керектүү маалыматтарды өз алдынча суратып алат. Эгер салыктык тобокелдиктер аныкталбаса, жол-жобо белгиленген тартипте жүргүзүлөт. Ал эми тобокелдиктер аныкталган учурда көчмө салыктык текшерүү дайындалат.
Белгилей кетсек, жол-жобону тездетүү үчүн салык төлөөчүлөргө салык төлөөчүнүн кабинети аркылуу карыздын бар же жок экенин алдын ала текшерип, зарыл болгон учурда жоюу боюнча отчетторду тапшыруу сунушталат.
Онлайн кайра каттоо
Эске салсак, буга чейин Салык кызматы жаңы онлайн кызматты ишке киргизген. Анын жардамы менен жеке ишкерлер салык органдарына барбастан салыктык кайра каттоодон өтүп, төмөнкү маалыматтарды өзгөртө алышат:
– реквизиттерди;
– ишмердүүлүктүн түрлөрүн;
– салык режимин;
– юридикалык даректи, бир райондун ичинде же башка районго көчкөн учурда.
Кызмат салык төлөөчүнүн кабинети аркылуу 24 саат жеткиликтүү. Арыздардын көпчүлүгү ыкчам жана акысыз каралып, бардык өзгөртүүлөр автоматтык түрдө киргизилет.
Мамлекеттик салык кызматы салык кызматтарын санариптештирүүнү мындан ары да улантып, аларды ишкерлер үчүн дагы жөнөкөй, ылдам жана ыңгайлуу кылууга багытталган иштерди жүргүзөт.
