“Тегирмен башы” эчки чарбасы 2 млн сомдук тыбыт өндүрүүнү пландоодо
Баткен районундагы “Тегирмен башы” мамлекеттик эчки чарбасына Ветеринария, мал чарбасын өнүктүрүү, жайыт жана тоют кызматынын жетекчиси Адилет Сотовалдиев тиешелүү адистер менен биргеликте иш сапары менен барып, чарбанын учурдагы абалы жана өнүгүү перспективалары менен таанышты.
Ветеринардык кызматтын маалыматына ылайык, иш сапардын жүрүшүндө чарбанын өндүрүштүк көрсөткүчтөрү, асыл тукум иштеринин жүрүшү, малдын саны, тоют базасы жана материалдык-техникалык камсыздалышы талкууланды.
Учурда чарбада кыргыз тыбыт породасындагы 2 миңден ашык эчки багылып, асыл тукум иштер системалуу жүргүзүлүүдө. Натыйжада чарбанын өндүрүштүк көрсөткүчтөрү жылдан-жылга жакшырып, 2026-жылы болжол менен 2 миллион сомдук тыбыт өндүрүү пландалууда.
Чарбаны өнүктүрүү максатында бир катар маанилүү иштер аткарылууда. Атап айтканда, 2025-жылы 200 баш асыл тукум эчки Ысык-Көл облусунун Жети-Өгүз районундагы Оргочор мамлекеттик чарбасына өткөрүлүп берилген. Ошондой эле Өнүктүрүү фонду аркылуу 14 миллион сомго айыл чарба техникаларын сатып алуу пландалып, жогорку сапаттагы асыл тукум текелер алынган. Мындан тышкары, 40 гектар жер аянтын өздөштүрүү мүмкүнчүлүгү кеңейтилип, тоют базасын чыңдоо боюнча иштер жүргүзүлүүдө.
Чарбанын материалдык-техникалык базасын жакшыртуу багытында сарайларды оңдоо жана калыбына келтирүү иштери башталып, жаңы техникалар менен камсыздоо чаралары көрүлүүдө. Ошондой эле акыркы жылдары топтолгон карыздардын негизги бөлүгү жоюлуп, чарбанын каржылык туруктуулугу чыңдалууда.
