Чаткалдын Курулуш айылына 21 млн сомго маданият үйү курулуп баштады
26-июнда Чаткал районунун Курулуш айылында жаңы маданият үйүнүн курулушуна мезгил кутучасын салуу аземи болуп өттү. Иш-чарага район акими Алтынбек Сеңирбаев катышып, бул долбоор аймактын социалдык жана маданий өнүгүүсү үчүн өзгөчө мааниге ээ экенин белгиледи. Бул тууралуу аталган райондун админстрациясынан маалымдашты.
Маалыматка ылайык, жаңы маданият үйүнүн курулушу мамлекеттин аймактарды өнүктүрүү саясатынын алкагында ишке ашырылып жаткан маанилүү долбоорлордун бири болуп саналат.
Аталган объект пайдаланууга берилгенден кийин айыл тургундары үчүн маданий иш-чараларды өткөрүүгө, жаштардын чыгармачылыгын өнүктүрүүгө жана калктын эс алуусуна ыңгайлуу шарт түзүлөт.
Долбоордун жалпы сметалык баасы 21 миллион 120 миң 612 сомду түзөт. Курулуш иштери Жалал-Абад облустук өнүктүрүү фондунун каржылоосу менен жүзөгө ашырылат.
