Ветеринардык көзөмөл посттору текшерилди
Баткен жана Ош облустарында мамлекеттик чек арадагы ветеринардык көзөмөл постторунун ишмердүүлүгү текшерилди. Бул тууралуу Айыл чарба министрлигинен билдиришти.
Маалыматка ылайык, Ветеринария, мал чарбасын өнүктүрүү, жайыт жана тоют кызматынын директору А. Сотовалдиевдин иш сапарынын жүрүшүндө “Кызыл-Бел”, “Кызыл-Кыя” жана “Достук” мамлекеттик чек ара ветеринардык көзөмөл посттору, ошондой эле “Кара-Суу” убактылуу сактоо кампасы текшерилди.
Текшерүүнүн жүрүшүндө ветеринардык-санитардык талаптардын аткарылышы, жаныбарлардын жана мал чарба продукцияларынын мамлекеттик чек ара аркылуу өткөрүлүшүнө жүргүзүлүп жаткан ветеринардык көзөмөлдүн сапаты, ветеринардык коштоочу документтердин таризделиши жана кызматкерлердин ишин уюштуруу маселелери каралды.
А.Сотовалдиев өлкөнүн эпизоотиялык туруктуулугун камсыз кылууда мамлекеттик чек аралардагы ветеринардык көзөмөлдүн өзгөчө мааниге ээ экенин белгилеп, жугуштуу жаныбарлардын ылаңдарынын өлкө аймагына киришине жол бербөө боюнча көзөмөлдү күчөтүүнү тапшырды. Ошондой эле импорттук жана экспорттук жүктөрдү кылдат текшерүү, ветеринардык-санитардык талаптарды так сактоо, мыйзамсыз ташууларга бөгөт коюу жана ветеринардык сертификаттардын аныктыгын дыкат текшерүү боюнча конкреттүү милдеттер коюлду.
Мындан тышкары, кызматкерлерге кызматтык тартипти так сактоо, коррупциялык көрүнүштөргө жол бербөө, мамлекеттик чек арадагы тиешелүү органдар менен өз ара кызматташууну күчөтүү жана ветеринардык коопсуздукту камсыздоо боюнча иштерди жогорку деңгээлде уюштуруу милдеттендирилди.
Текшерүүнүн жыйынтыгында аныкталган кемчиликтерди өз мөөнөтүндө жоюу жана мамлекеттик ветеринардык көзөмөлдүн натыйжалуулугун мындан ары жогорулатуу боюнча тиешелүү тапшырмалар берилди.
