Кадамжайдын 7 айылы таза суу менен камсыз болот
Баткен облусунун Кадамжай районунун Ак-Турпак айыл аймагынын 7 айылы таза суу менен камсыз болот. Бул тууралуу президенттин Баткен облусундагы ыйгарым укуктуу өкүлүнүн басма сөз кызматы билдирди.
Маалыматка караганда, Кыргызстан менен Дүйнөлүк Банктын ортосундагы макулдашууларга ылайык, аталган банктын каржылоосу менен, “Климаттын өзгөрүшүнө туруктуу суу чарба кызматтарын жакшыртуу” долбоорунун алкагында, Кыргызстандын 31 айылына таза суу долбоору ишке ашырылууда. Долбоорго Баткен облусунан 28 айыл кирген болсо, анын жетөө Кадамжай районуна караштуу Ак-Турпак айыл өкмөтүнүн айылдары болуп эсептелет.
Ак-Турпак айыл өкмөтүнүн башчысы Жээнбек Макканбаевдин маалыматында, учурда долбоордун алкагында 2 тике суу кудугу жана 3 суу кампасы үчүн трансформациялоо иштери бүткөрүлгөн. Кызыл-Коргон айылында 100 метр тереңдикте тике суу кудугу казылып, суу лабороториядан өткөрүлүп, ичүүчү суу катары колдонууга уруксаат алынды. Алдыда суу түтүктөрүн тартуу иштери башталат. Курулуш 2027-жылга аяктап, 7 айылдын элине таза суу жетет.
