Өлкөнү күйүүчү май менен камсыздоо боюнча жыйын өткөрүлдү
Министрлер Кабинетинин төрагасы Адылбек Касымалиев өлкөнү күйүүчү-майлоочу май менен камсыздоо маселеси боюнча кезектеги жыйынын өткөрдү. Бул тууралуу президенттик админстрациянын маалыматтык саясат бөлүмүнөн билдиришти.
Жыйында белгиленгендей, бул маселе Министрлер Кабинетинин туруктуу күн тартибинде турат: күйүүчү май рыногун көзөмөлдөө боюнча иштер бардык кызыкдар тараптар, анын ичинде тийиштүү мекемелердин жана бизнес-коомчулуктун өкүлдөрүнүн тыгыз өз ара аракеттенүүсү менен жүргүзүлүүдө.
Мунай заттарынын учурдагы запастары жана рыноктогу абал боюнча профилдик мекемелер жаңыртылган маалыматтарды сунушташты. Өлкөгө жеткирүүнүн туруктуулугуна глобалдык геосаясий факторлор таасирин тийгизип, логистикалык чынжырларга жана баа түзүүгө кысым көрсөтүп жатканы белгиленди.
Адылбек Касымалиев күйүүчү импорттоонун альтернативдүү булактары боюнча толук баяндамаларды укту. Талкуулардын алгачкы этаптарында башталган жеткирүүлөрдү диверсификациялоо боюнча иштер буга чейин эле натыйжа берип жатканы баса белгиленди: бир катар жаңы багыттар боюнча конкреттүү макулдашууларга жетишилди, бул кырдаалды көзөмөлдө кармоого мүмкүндүк берет.
Министрлер Кабинетинин төрагасы өлкөнүн энергетикалык коопсуздугун камсыздоонун жана ички рынокто күйүүчү майдын жетишсиздигине жол бербөөнүн стратегиялык маанилүүлүгүнө кайрадан токтолду, анткени бул экономиканын бардык тармактарынын, анын ичинде агрардык сектордун жана транспорттун туруктуу иштешинин негизи болуп саналат.
Жыйындын жыйынтыгында Адылбек Касымалиев бир катар конкреттүү тапшырмаларды берди, анын ичинде күйүүчү-майлоочу майды жеткирүү абалына күн сайын текшерүү жүргүзүп, ыкчам отчетторду берүүнү талап кылды. Мындан тышкары, Министрлер Кабинетинин төрагасы мындай жыйындарды жума сайын өткөрүү практикасын бекемдөөнү, ыкчам чараларды көрүүнү жана бардык кызыкдар тараптардын туруктуу даярдыгын камсыздоону тапшырды.
