Кылмыштуу топтон 2 млн 450 миң сом жана психотроптук заттар алынды
ИИМдин Баңгизаттарды мыйзамсыз жүгүртүүгө каршы күрөшүү кызматы “Канал-Янтарь жээги” эл аралык операциясынын алкагында психотроптук заттарды жана күчтүү таасир этүүчү дары-дармектерди мыйзамсыз сатуу менен алектенген кылмыштуу топтун ишмердүүлүгүнө бөгөт койду.
ИИМдин маалыматына ылайык, Бишкек шаарында жүргүзүлгөн ыкчам иш-чаралардын жүрүшүндө төрт жаран кармалып, тергөөнүн жыйынтыгында кылмыштуу топтун уюштуруучусу катары 1972-жылы туулган жаран аныкталган.
Анын жашаган жеринде жүргүзүлгөн тинтүүдө миңдеген психотроптук препараттар, ошондой эле кылмыштуу аракеттен түшкөн деп болжолдонгон 2 миллион 450 миң сом акча каражаты алынган.
Алынган психотроптук заттардын жалпы болжолдуу баасы 12 миллион сомго жакын экени аныкталган.
Бул факты боюнча Кылмыш-жаза кодексинин 282-беренеси боюнча кылмыш иши козголуп, учурда тергөө жана ыкчам-издөө иш-чаралары уланууда.
