Ветеринария кызматына 6,6 млн сомдук техникалар тапшырылат
Бириккен Улуттар Уюмунун Азык-түлүк жана айыл чарба уюмунун Кыргызстандагы өкүлчүлүгү Суу ресурстары, айыл чарба жана кайра иштетүү өнөр жайы министрлигине караштуу Ветеринария, мал чарбасын өнүктүрүү, жайыттар жана тоют кызматына кызматтык автоунаа жана жайыттарга мониторинг жүргүзө турган заманбап техникалык жабдууларды тапшырат.
Айыл чарба министрлигинин маалыматына ылайык, техникалар жана жабдуулар ФАО менен Жашыл климаттык фонддун колдоосу аркылуу ишке ашырылып жаткан “Кыргыз Республикасында токойлорго жана жайыттарга климаттык инвестициялар аркылуу көмүртекти секвестрлөө” долбоорунун алкагында берилүүдө. Алар жайыттарды текшерүү, алардын абалын баалоо жана долбоордук иш-чараларды натыйжалуу жүргүзүү үчүн пайдаланылат.
Өткөрүлүп берилүүчү мүлктүн жалпы наркы 6 667 478,77 сомду түзөт. Ага төмөнкүлөр кирет:
Toyota Hilux кызматтык автоунаасы;
DJI Mavic 3 Enterprise RTK учкучсуз учуучу аппараты (дрон);
3 даана заманбап ноутбук;
жогорку өндүрүмдүү персоналдык компьютер;
бензин генератору;
күн панелдери жана көчмө энергия сактагыч;
жайыттарды текшерүүгө арналган талаа жабдуулары жана инвентарлар.
Бул колдоо Ветеринария, мал чарбасын өнүктүрүү, жайыттар жана тоют кызматынын материалдык-техникалык мүмкүнчүлүгүн чыңдап, жайыттарды туруктуу башкаруу, климаттын өзгөрүшүнө ыңгайлашуу жана Кыргызстандын жаратылыш ресурстарын натыйжалуу пайдалануу боюнча жүргүзүлүп жаткан иштердин натыйжалуулугун жогорулатууга багытталган.
