“Бала ырысы” жөлөк пулуна бир күндө 13 782 арыз кабыл алынды
1-июлдан тартып Эмгек, социалдык камсыздоо жана миграция министрлиги “Түндүк” ААК менен биргеликте үч жашка чейинки балдарга берилүүчү мамлекеттик “Бала ырысы” жөлөк пулуна Кыргызстандын жарандарынын арыздарын кабыл алууну баштады.
Алгачкы күндө эле “Бала ырысы” жөлөк пулуна жалпысынан 14 318 арыз келип түштү. Анын ичинен 13 782 арыз мамлекеттик жөлөк пул дайындоого кабыл алынып, бул жалпы арыздардын 96,2%ын түздү.
Арыздардын 12 205и жарандар тарабынан мобилдик тиркеме аркылуу электрондук форматта берилип, кабыл алынды. Ал эми 1 577 арыз кагаз жүзүндө тапшырылды. Ошол эле учурда Эмгек, социалдык камсыздоо жана миграция министрлигинин аймактык башкармалыктарынын жана “Түндүк” ААКнын кызматкерлери жарандарга мобилдик тиркеме аркылуу арыз берүүгө көмөк көрсөтүштү.
Тилекке каршы, 536 арыз 4% кабыл алынган жок. Мунун негизги себептери мамлекеттик маалыматтык системалардагы жана мамлекеттик маалыматтык ресурстардагы маалыматтардын дал келбестиги болуп саналат.
