Бишкектин Жал кичи районунда 9 кабаттуу унаа токтотуучу жайы курулууда
Бишкек шаарынын мэри Айбек Жунушалиев борбор калаада курулуп жаткан жана оңдоп-түзөөдөн өткөрүлүп жаткан объектилерди кыдырып, жумуштун жүрүшү менен таанышты.
Бишкек шаардык мэриясынын маалыматына ылайык, калаа башчысы алгач И.Ахунбаев жана Репин көчөлөрүнүн кесилишиндеги “Үмүт чырагы” адистештирилген бала бакчасынын курулушуна барды.
Жалпы аянты 3467 чарчы метрди түзгөн заманбап эки кабаттуу имарат 250 балага ылайыкташып, ден соолугунун мүмкүнчүлүгү чектелген балдар үчүн курулууда. Мекемеде окуу кабинеттери, гимнастика залы, логопеддин кабинети, ошондой эле контакттык зоопарк каралган. Курулуш иштерин “Артвин” ЖЧК подряддык уюму аткарууда.
Андан соң Айбек Жунушалиев көп деңгээлдүү унаа токтотуучу жайдын курулушу менен таанышты. Жалпы аянты 35 миң чарчы метрге жакын тогуз кабаттуу объект болжол менен 900 унаага ылайыкташкан. Долбоордо үч жер төлө жана алты жер үстүндөгү кабат каралган. Курулушту “Шерой” компаниясы жүргүзүүдө.
Ошондой эле борбор калаанын башчысы Б.Миңжылкиев көчөсүнүн курулушу менен таанышты.
Курулуп жаткан жаткан тилкенин жалпы узундугу 1,35 чакырымды түзөт. Долбоордо туурасы 8 метр болгон унаа өтүүчү бөлүктү куруу жана көчөнүн эки тарабына тең тротуарларды салуу каралган.
