Ош облустук ооруканасынын сейсмикалык абалы текшерилди
Курулуш министрлигине караштуу Жер титирөөгө туруктуу курулуш жана инженердик долбоорлоо мамлекеттик институтунун Түштүк филиалы тарабынан Ош облустук клиникалык ооруканасынын D блогунун имаратына инженердик текшерүү жүргүзүлдү. Бул тууралуу Курулуш министрлигинен билдиришти.
Маалыматка караганда, текшерүү Ош шаарынын Увам көчөсүндө жайгашкан имараттын учурдагы техникалык жана сейсмикалык абалын аныктоо максатында өткөрүлдү. Бул текшерүү аталган имаратты перинаталдык борбор катары оңдоп-түзөө боюнча кайрылуунун негизинде текшерилди.
Адистер долбоордук жана техникалык документтер менен таанышып, имараттын негизги конструкциялык элементтерине тиешелүү өлчөөлөрдү жүргүзүштү, ошондой эле алардын техникалык абалын баалоо үчүн зарыл болгон техникалык сыноолорду өткөрдү.
Текшерүүнүн жыйынтыгы боюнча институт тарабынан курулуш конструкцияларынын техникалык абалы тууралуу тиешелүү корутунду даярдалып берилет.
