Чоң-Алай районунда Миң-Жар каналы курулууда
Чоң-Алай районунун Кашка-Суу айыл өкмөтүнүн аймагында жаңыдан курулуп жаткан Миң-Жар каналы райондогу сугат жерлердин аянтын кеңейтүүгө жана айыл чарба өндүрүшүн өнүктүрүүгө багытталган маанилүү инфраструктуралык долбоор болуп саналат. Бул тууралуу Айыл чарба министрлигинен билдиришти.
Маалыматка ылайык, долбоордун негизги максаты – буга чейин сугат суу жетпеген, кунарсыз жана натыйжалуу пайдаланылбай келген жайыт жерлерди өздөштүрүп, айыл чарба жүгүртүүсүнө киргизүү болуп эсептелет.
Канал толук пайдаланууга берилгенден кийин 1400 гектар жер аянты сугат суу менен камсыз болуп, жаңы өздөштүрүлгөн аймактарда картошка, тоют өсүмдүктөрү, дан эгиндери жана башка айыл чарба өсүмдүктөрүн өстүрүүгө кеңири мүмкүнчүлүк түзүлөт.
Миң-Жар каналынын курулушунун натыйжасында:
1400 гектар жаңы сугат жер өздөштүрүлөт;
жер ресурстарынын натыйжалуу пайдаланылышы камсыздалат;
айыл чарба продукциясынын көлөмү жана түшүмдүүлүгү жогорулайт;
мал чарбачылыгы үчүн тоют базасы бекемделет;
жаңы жумуш орундарын түзүүгө жана жергиликтүү калктын кирешесин көбөйтүүгө өбөлгө түзүлөт;
Кашка-Суу айыл аймагында азык-түлүк коопсуздугун камсыздоого жана айыл чарбасын туруктуу өнүктүрүүгө олуттуу салым кошулат.
Миң-Жар каналы – Чоң-Алай районунун ирригациялык инфраструктурасын жакшыртуу менен бирге, аймактагы пайдаланылбай келген жерлерди айыл чарба жүгүртүүсүнө тартууга жана калктын социалдык-экономикалык абалын жакшыртууга багытталган стратегиялык маанидеги долбоорлордун бири болуп саналат.
