Жети-Өгүздө 102 млн сомго мектеп курулууда
Ысык-Көл облусунун Жети-Өгүз районундагы Кызыл-Суу айылында 275 орундуу Э.Гапаров атындагы жаңы мектептин курулушу жүрүп жатат. Долбоор республикалык бюджеттин эсебинен каржыланып, курулуш иштери 2024-жылдын октябрь айында башталган. Объекттин жалпы наркы 102 миллион сомду түзөт.
Курулуш министрлигинин маалыматына караганда, долбоорго ылайык, мектеп заманбап талаптарга жооп берген эки кабаттуу имарат болуп курулат. Анда окуучулардын сапаттуу билим алуусу үчүн лабораториялар, китепкана, ашкана, компьютердик класс, жыйындар залы жана спорт залы каралган.
Мектептин жалпы аянты 1 596 чарчы метрди түзөт. Учурда имараттын терезелери толугу менен орнотулуп, ички жана тышкы курулуш-монтаждоо иштери жүргүзүлүүдө.
Объекттеги курулуш иштеринин жүрүшү жана сапаты Курулуш министрлигине караштуу Турак жай-жарандык курулуш департаменти тарабынан көзөмөлдөнүүдө.
