“Ак-Тилек”, “Ак-Жол” көзөмөл-өткөрүү пункттарында текшерүү жүргүзүлдү
Өсүмдүктөрдү химиялаштыруу, коргоо жана карантин департаменти тарабынан “Кант” убактылуу сактоо кампасында, ошондой эле “Ак-Тилек” жана “Ак-Жол” көзөмөл-өткөрүү пункттарында күтүүсүз текшерүү жүргүзүлдү. Бул тууралуу Айыл чарба министрлигинен билдиришти.
Маалыматка ылайык, текшерүүнүн жүрүшүндө фитосанитардык көзөмөлдүн жүргүзүлүшү, кызматкерлердин кызматтык милдеттерди аткаруусу, иш кагаздарынын туура жүргүзүлүшү, ошондой эле мыйзам талаптарынын сакталышы комплекстүү түрдө бааланды.
Ошондой эле текшерүүнүн жүрүшүндө коррупциялык тобокелдиктердин алдын алуу, ачык-айкындуулукту камсыз кылуу жана кызматтык этиканын талаптарын так сактоо маселелерине өзгөчө көңүл бурулду.
Текшерүүнүн жыйынтыгында посттордун ишмердүүлүгү оң бааланып, кызматкерлердин жоопкерчиликтүү мамилеси, кызматтык тартипти сактоосу жана фитосанитардык көзөмөлдү талаптарга ылайык жүргүзүп жатканы белгиленди.
Өсүмдүктөрдүн карантини жана фитосанитардык коопсуздукту камсыздоо багытындагы мындай текшерүүлөр мындан ары да үзгүлтүксүз жүргүзүлөт.
