Бакыт Сыдыков: Кыргызстанда жакырчылыктын деңгээли 24%га төмөндөдү
Экономика жана коммерция министри Бакыт Сыдыков Нью-Йорк шаарында өтүп жаткан БУУнун Туруктуу өнүгүү боюнча жогорку деңгээлдеги саясий форумунун министрлер сегментинде сөз сүйлөдү. Бул тууралуу аталган министрликтен билдиришти.
Маалыматка ылайык, министр дүйнөлүк коомчулук климаттын өзгөрүшү, куралдуу жаңжалдар, жеткирүү чынжырларынын үзгүлтүккө учурашы жана технологиялык теңсиздик сыяктуу жаңы чакырыктарга туш болуп жатканын белгилеп, Туруктуу өнүгүү максаттарына жетүүнү тездетүү менен катар буга чейин жетишилген ийгиликтерди сактап калуунун маанисин баса белгиледи.
Өзгөчө көңүл тоолуу өлкөлөрдүн туруктуу өнүгүүсүнө бурулуп, мөңгүлөрдүн чегиниши суу коопсуздугуна, азык-түлүк өндүрүшүнө жана энергетикалык системаларга олуттуу коркунуч жаратып жатканын айтты. Ошондой эле 2027-жылы Кыргызстанда өтө турган “Бишкек+25” Экинчи Глобалдык тоо саммитине БУУга мүчө мамлекеттерди жана өнөктөштөрдү катышууга чакырды.
Министр Кыргызстандын 2021–2025-жылдардагы социалдык-экономикалык жетишкендиктерин да белгилеп, бул мезгилде жакырчылыктын деңгээли 33%дан 24%га чейин төмөндөп, экономиканын орточо жылдык өсүшү 10%га жакын болгонун маалымдады.
Ошондой эле Кыргызстандын 2027–2028-жылдарга БУУнун Коопсуздук Кеңешинин туруктуу эмес мүчөсү болуп шайланышы өлкөгө болгон эл аралык ишенимдин көрсөткүчү экенин белгилеп, Кыргызстан мындан ары да эл аралык кызматташтыкты жана тынчтык демилгелерин илгерилетүүгө даяр экенин ырастады.
