Оштогу айрым тамактануучу жайлар убактылуу жабылды
Ош шаарынын мэриясынын 2026-жылга бекитилген иш планына ылайык, июль айында “Ош шаарында коомдук тамактануу жайларында тамак-аш коопсуздугу боюнча санитардык талаптардын аткарылышы” маселеси боюнча комиссиянын отуруму өтөт.
Ош шаардык мэриясынын басма сөз кызматынын маалыматына ылайык, 9-июлда Ош шаардык Оорулардын алдын алуу жана мамлекеттик санитардык-эпидемиологиялык көзөмөлдөө борборунун жана Ветеринардык кызматтын адистеринен турган комиссия түзүлгөн.
Комиссия тарабынан 13-июлдан тартып рейддик иш-чаралар жүргүзүлүп, Курманжан-Датка жана А. Шакиров көчөлөрүндө жайгашкан 10го жакын кафе жана тез татым жайларында текшерүү жүргүзүлдү.
Текшерүүнүн жүрүшүндө бир катар коомдук тамактануу жайларында санитардык-гигиеналык талаптардын сакталбагандыгы, ошондой эле продукциянын сапатын тастыктоочу документтердин жоктугу аныкталды.
Аныкталган кемчиликтерди жоюу максатында аталган объекттердин иши кемчиликтер толук жоюлганга чейин убактылуу токтотулду.
Ошондой эле мыйзамсыз ишмердүүлүк фактылары аныкталып, материалдар укук коргоо органдарына өткөрүп берилди. Кээ бир жайлардын жетекчилерине генералдык тазалоо жана дезинфекциялоо жүргүзүү тапшырылды.
