Бишкектеги билим берүү мекемелеринин курулушу көзөмөлдөндү
14-июлда Бишкек шаарынын мэри Айбек Жунушалиев Жогорку Кеңештин депутаты Гуля Кожокулова менен биргеликте билим берүү мекемелеринин кошумча корпустарынын курулушу жана капиталдык оңдоо иштеринин жүрүшүн текшерди.
Бишкек шаардык мэриясынын басма сөз кызматынын маалыматына ылайык, текшерүүнүн жүрүшүндө катышуучулар №56 мектептин капиталдык оңдоо иштеринин жүрүшү менен таанышышты. Учурда объектте бузуу жана электр монтаждоо иштери аяктап, жасалгалоо жана курулуш-монтаждоо иштери уланууда.
Долбоордо имаратты толугу менен жаңылоо каралган. Мектептин аймагында кичи футбол жана баскетбол аянтчалары, воркаут жана балдар аянтчалары, чуркоо үчүн жолдор, тышкы жарыктандыруу жана тротуарлар курулат.
Жогорку Кеңештин депутатынын демилгеси менен борбор калаанын башчысы мектептин фасадынын заманбап архитектуралык чечимин иштеп чыгууну тапшырды. Мында билим берүү мекемеси балдар үчүн жагымдуу, коопсуз жана ыңгайлуу болушу керектиги эске алынат.
