Нарындагы инновациялык мектепте оңдоп-түзөө иштери жүрүүдө
Нарын шаарындагы №4 инновациялык мектепте капиталдык оңдоп-түзөө иштери жүрүүдө. Бул тууралуу Билим берүү министрлигинин басма сөз кызматы билдирди.
Маалыматка ылайык, аталган жалпы билим берүү мекемеси 12 жылдык билим берүү системасына өтүүнүн алкагында тандалып алынган 53 инновациялык мектептин бири болуп саналат.
Белгилей кетсек, инновациялык мектептер жаңы мамлекеттик билим берүү стандарттарын ишке ашыруунун, STEM-билим берүүнү өнүктүрүүнүн, санариптик технологияларды кеңири жайылтуунун жана мектептер аралык кызматташууну чыңдоонун негизги аянтчасы болуп эсептелет.
Учурда мектепте капиталдык оңдоп-түзөө иштери белгиленген графикке ылайык кызуу жүрүп жатат. Имараттын биринчи, экинчи жана үчүнчү кабаттарындагы дубалдардын эски катмары толугу менен тазаланып, сырдоогө даярдалды. Полдор алынып, электр зымдары толугу менен жаңыртылды. Ошондой эле спорт зал, жыйындар залы STEM-кабинеттерин жаңылоо иштери жүрүп жатат.
