2027-жылдан тарта желим буюмдарды өндүрүүгө жана сатууга тыюу салынат
Мамлекеттик саясаттын алкагында, глобалдык демилгени жигердүү колдоого алуу менен, Жаратылыш ресурстары, экология жана техникалык көзөмөл министрлиги этап-этабы менен айрым түрдөгү желим буюмдардын жана полимердик пленкалардын жүгүртүүсүн чектөөнү киргизип жатат. Бул тууралуу аталган министрликтен билдиришти.
Маалыматка ылайык, желим буюмдардын калдыктарына байланыштуу экологиялык көйгөйлөр, алардын адамдардын жана жаныбарлардын ден соолугуна тийгизген таасири жылдан-жылга дүйнөлүк масштабда глобалдык мүнөзгө ээ болууда.
Желим буюмдан жана андан келип чыккан булгануу адамдын ден соолугуна терс таасирин тийгизет, ал биздин организмге күн сайын желим нерсе менен болгон өз ара аракеттенүүдөн улам микро- жана нано-бөлүкчөлөр түрүндө кирет, бул тамак-аш, таңгак, суу, аба аркылуу болот. Ар кандай технологиялар менен жасалган желим буюмдардын чириши орточо эсеп менен 400дөн 700 жылга чейин созулат. Полиэтилен баштыктар жаратылышта 100-200 жыл бою чирип, туруктуу органикалык булгоочу заттар болуп саналат.
2023-жылдан баштап, өлкөдө мыйзамдуу түрдө Ысык-Көл облусунда, ошондой эле өзгөчө корголуучу жаратылыш аймактарында кээ бир желим буюмдардын жана полимер пленка баштыктарынын жүгүртүүсүнө чектөө киргизилген.
2027-жылдан баштап, полимер пленкасынан жасалган баштыктарды жана желим буюмдарды өндүрүүгө, сатууга тыюу салынат.
