Кыргызстанда орточо айлык 51 миң 888 сомду түздү
Кыргызстанда 2026-жылдын январь-май айларында чакан ишканаларды эсепке албаганда, бир кызматкердин орточо айлык номиналдык эмгек акысы 51 миң 888 сомду түзүп, 2025-жылдын ушул эле мезгилине салыштырмалуу 25%га өстү. Ал эми керектөө бааларынын индексин эске алуу менен эсептелген реалдуу эмгек акы 13,1%га жогорулады.
Статистика комитетинин маалыматына ылайык, 2026-жылдын январь-май айларында өткөн жылдын ушул эле мезгилине салыштырмалуу орточо айлык номиналдык эмгек акынын өсүшү экономикалык ишмердиктин бардык түрлөрү боюнча ишкана жана уюмдарда байкалган.
Айлык акынын эң көп өсүшү маданият, көңүл ачуу жана эс алуу тармагында – 42,9%ды, саламаттык сактоо жана калкты социалдык жактан тейлөө тармагында – 38,2%ды, билим берүүдө – 34,6%ды, айыл чарба, токой чарбасы жана балык уулоодо –34,4%ды, кесиптик, илимий жана техникалык ишмердикте – 32,2%ды түзгөн.
Ошондой эле суу менен камсыздоо, саркынды сууларды тазалоо, калдыктарды иштетүү жана кайра иштетилүүчү чийки заттарды алуу тармагында –28,3%га, кыймылсыз мүлк менен операцияларды жүргүзүүдө – 24,9%га, финансылык ортомчулук жана камсыздандырууда – 23,7%га, курулуш тармагында –22,5%га, ошондой эле транспорт жана жүктөрдү сактоо тармагында – 20%га өскөн.
