Бир жумада жол эрежесин бузган 23 миңден ашуун айдоочу аныкталды
Кыргызстандын аймагында 17-июлдан 23-июлга чейин алдын ала маалымат боюнча 23 миң 735 жол эрежесин бузуу фактысы аныкталды. Бул тууралуу Жол кыймылынын коопсуздугун камсыздоо башкы башкармалыгы билдирди.
Маалыматка ылайык, катталган мыйзам бузуулардын арасында тиешелүү документтери жок транспорт каражаттарын башкаруу боюнча 4 миң 619 факт, транспорт каражатын мас абалында айдоо боюнча 429 учур аныкталган.
Ошондой эле автоунаалардын терезелерин мыйзамсыз караңгылатуу боюнча 222, жөө жүргүнчүлөр жол эрежесин бузга учурлар 924, транспорт каражаттарын эксплуатациялоо талаптарын бузуу боюнча 4 миң 451 факт катталган.
Мындан тышкары, жолдогу автоээнбаштык боюнча 22 учур, белгиленген ылдамдык чегинен ашуу боюнча 1 миң 226 факт, жалган мамлекеттик номур менен унаа башкаруу боюнча 11 мыйзам бузуу аныкталган.
Башка жол эрежелерин бузуу фактыларынын саны 8 миң 614тү түздү.
Жол эрежелерин бузгандыгы үчүн 3 миң 217 автоунаа убактылуу токтотуучу айып короо жайына киргизилди.
Жол кыймылынын коопсуздугун камсыздоо кызматтары айдоочуларды жол эрежелерин сактоого жана коопсуз айдоого чакырат.
