Манас шаарында курулуп жаткан жүрөк-кан тамыр борбору 1 млрд сомго каржыланды
Манас шаарында 250 орундуу Түштүк аймактык жүрөк-кан тамыр борбору курулуп жатат. Учурда 7 кабаттуу заманбап медициналык мекеменин курулуш иштеринин 50%дан ашыгы аткарылды.
Калаа мэриясынын басма сөз кызматы билдиргендей, 150дөн ашык жумушчу мекеме белгиленген мөөнөттө бүткөрүлүшү үчүн бардык аракеттерди көрүп жатышат.
Белгиленгендей, долбоор Турукташтыруу фондунун эсебинен 1 млрд сом өлчөмүндө каржыланууда. Жаңы борбор заманбап медициналык жабдуулар менен камсыздалып, жүрөк-кан тамыр ооруларын эрте аныктоо жана сапаттуу дарылоо үчүн кеңири мүмкүнчүлүктөрдү түзөт.
Маалыматка ылайык, аталган борбор ишке кирсе, түштүк аймактын тургундарына көрсөтүлүүчү адистештирилген медициналык жардамдын сапаты жогорулап, бейтаптар үчүн ыңгайлуу шарттар түзүлөт.
