Мас абалда унаа башкаргандар 126 млн сомдон ашык айып пул төлөшөт
Мас абалында унаа башкаргандарга карата жаза күчөтүлгөнүнө карабастан, мындай мыйзам бузуулар токтой элек. 20-июндан тартып жаңы талаптар күчүнө киргенден кийинки бир ай ичинде өлкө аймагында 1500дөн ашуун мас айдоочу аныкталды.
Ички иштер министрлигинин маалыматына ылайык, аларга карата 126 млн сомдон ашуун айып пул салынган. Ал эми 2026-жылдын алты айында мас абалында унаа башкарган 9600дөн ашык учур катталган.
Жаңы мыйзамга ылайык, мас абалында транспорт каражатын башкарган айдоочу эки жылдык мөөнөткө айдоочулук укугунан ажыратылып, 80 миң сом өлчөмүндө айып пул төлөйт.
Мындан тышкары, мас абалда унаа айдап, адам өлүмү менен коштолгон жол кырсыгына себепкер болгон учурда жоопкерчилик күчөтүлүп, күнөөлүү адам 10 жылга чейин эркиндигинен ажыратылып, 12 жылга чейин транспорт каражатын башкаруу укугунан ажыратылышы мүмкүн.
Статистикага ылайык, адам өлүмү менен коштолгон оор жол кырсыктарынын себептеринин арасында мас абалда унаа башкаруу, каршы тилкеге чыгуу жана ылдамдыкты ашыруу негизги орунда турат.
Министрлик айдоочуларды жол коопсуздугуна жоопкерчилик менен мамиле кылууга чакырат. Ичимдик ичкенден кийин рулга отурбоо — өзүнүн жана башка жол катышуучуларынын өмүрүн сактоонун эң маанилүү шарттарынын бири.
