Ноокатта 850 млн сомго курулуп жаткан канал ишке кирсе, жаңы жерлер өздөштүрүлөт
Ноокат районунун Төрөбай Кулатов айыл өкмөтүнө караштуу Каримберди бөлүмүндө узундугу 16 чакырымды түзгөн каналдын курулушу аяктоо алдында турат. Бул тууралуу Айыл чарба министрлигинин басма сөз кызматы билдирди.
Маалыматка ылайык, канал келерки жылы пайдаланууга берилип, анын жардамы менен 1000 гектарга жакын жерди өздөштүрүү мүмкүнчүлүгү түзүлөт. Долбоордун сметалык баасы 850 млн сомду түзөт.
Мындан тышкары, министрлик 380 гектар жерге тамчылатып сугаруу тутумун орнотуу үчүн керектүү түтүктөрдү сатып алды.
Долбоордун алкагында аталган аймакка көп жылдык бак-дарактар отургузулуп, органикалык мөмө-жемиштерди өндүрүү жана аларды экспортко чыгаруу пландалууда.
Министрликтен билдиришкендей, Каримберди каналынын ишке кириши аймактагы айыл чарба өндүрүшүн кеңейтүүгө жана жергиликтүү дыйкандар үчүн жаңы мүмкүнчүлүктөрдү түзүүгө багытталган.
