Таласта далилдерди жок кылган жооптуу кызмат адамдарына кылмыш иши козголду
Талас облусунун прокуратурасы Жаратылыш ресурстары, экология жана техникалык көзөмөл министрлигинин аймактык башкармалыгында жүргүзүлгөн текшерүүдө мыйзам бузуу фактыларын аныктады.
Башкы прокуратуранын маалыматына ылайык, Таластагы башкармалыктын жооптуу кызмат адамдары укук бузуу боюнча түзүлгөн бир катар протоколдордун алкагында буюм далил катары алынган жалпы саны 301 даана жилингир балыгын, 17 даана кекиликти, 1 даана уларды жана 26,31 килограмм эндик чөбүнүн тамырын мыйзамсыз жок кылышканы белгилүү болду.
Аталган факты боюнча Кылмыш-жаза кодексинин 337-беренеси ("Кызмат абалынан кыянаттык менен пайдалануу") боюнча кылмыш иши козголду.
Учурда иш боюнча бардык жагдайларды аныктоо үчүн тергөө амалдары жүрүп жатканы белгиленди.
